AGUA dinha

Nesedu, bédju'l mundu,(donu) na Baia d'Azorta, Fogo.

Desdi mutu sédu 'n komesa ta trabadja komu "Farm & Land Security Officer" (guarda di korbu/galinha guiné). N'es funsãu, 'n konsigui jerê várius txáda di mankara, txápa batatera y padjigaladas di lugá. Na izukuta es trabadju, 'n dizinvolvê txêu interesi na agrikultura ki própi 'n fazê formasãu na kampu agráriu.

'N studa na Universalidadi di Kartidjinha taki 'n forma na Kartidjona Agrária. Na prusésu di formasãu, 'n fazê várius diskubertas sientifiku na ária di ninhu galinha guiné, ki rendê txêu óbu pa paiz, y 'n ten kapituradu txêu kartuniz ku aplikasãu di téknika di IMBÁPU.

A nivel di agrikultura, 'n konsigui kabâ ku tudu piôru (kuza más margós ki podê nesê na mundu). 'N fazê prantasãu y transprantasãu di babosa, karapati y purguera, kê prantas rakunhisedu pa sés valor di margosera, kosera y nodiera, raspetivamenti.

A nivel di disportu, 'n foi tres bes kampiãu di BÓDIO. 'N vensê kurida di bódi na sidadi diserta di Rabent'anzol, ku bódi di nomi Rê-d-Inferu; y dos bes na váli di Lápa Kruxa, ku bódi di nomi Kársa Txapadu. Tanbê 'n foi djugador di pion y di boton.

A nival kultural tanbê tevi susésu. 'N foi kompusitor y intrépi di txôru na kruz. 'N ten kompiladu txêu txôru y 'n ten txoradu na txêu kruz ragional y nasional. Di salientâ, k'el famosu konsértu na Kruz di Kafanhotu ki'n perdê nha pirzi di bela, y na Kruz d'Ósu, ki un pé d'arbeka bá na frosta dividu a invasãu di públiku.